Estimated reading time: 5 minutes
Die Griekwastad-skou, wat van 14 tot 15 Maart 2024 plaasgevind het, was ‘n fenomenale sukses. Met ‘n rekordgetal uitstallers en inskrywings, is dit duidelik dat die skou jaarliks nuwe hoogtes bereik. Die toewyding van die skoukomitee het verseker dat elke jaar se skou nog beter is as die vorige, en hulle kan met reg trots wees op hul prestasies.
Die skou het vanjaar die Noord-Kaapse Boerbok- en Savanna-kampioenskappe aangebied. Anja Meintjes, sekretaresse van die skoukomitee, het aangedui dat daar planne is om die Boerbok- en Dorper-kampioenskappe af te wissel. Die Dorperskou veral is die ideale voorloper vir die Bloemfontein-skou.
‘n Besondere toevoeging tot die skou was die Persie-skaapkompetisie, waar swartkop-, rooikop- en skilder-Persies hul staal gewys het. Die interrasbeeskompetisie het beesprodusente die geleentheid gebied om hul diere teen die hoogste standaarde te meet.
Rekordgetal inskrywings vir Boerbokke
Die Boerbok-kampioenskappe het ‘n rekordgetal inskrywings gelok, wat dit een van die grootste Boerbok-kampioenskappe maak wat nog by die Griekwastad-skou aangebied is. Volgens Meintjes is dit een van die grootste Boerbok-kampioenskappe wat nog by Griekwastad-skou aangebied is.
Lukas Burger van Griekwastad het uitgeblink deur beide die reserwe- en juniorkampioenramme te vertoon. Die reserwe-juniorkampioen-ooi het ook uit sy kraal gekom. Die juniorkampioen-ooi was dié van Hein Booysen van Kuruman.
In die senior afdeling het Burger die reserwe- sowel as die seniorkampioen-ram vertoon en die seniorkampioen-ooi kom ook uit sy stoet, met Connie Coetzee van CNC Boerdery in Prieska wat die reserwe-seniorkampioen-ooi ingeskryf het.
Burger het die grootkampioen-ooi vertoon en die reserwe-grootkampioen-ooi kom uit die stoet van Booysen. Burger het ook met die louere weggestap toe die grootkampioen-ram sowel as die reserwe-grootkampioen-ram gekroon is.
Savanna-bokke sorg vir verrassings
Die Suid-Afrikaanse Savanna-kampioenskappe het vir ‘n verrassing gesorg toe Maize Valley Boerdery van Hoopstad byna al die pryse ingepalm het. Eienaars Ju-Mari Pretorius en Andrew Roberts het die kompetisie oorheers, met uitstekende prestasies in beide die junior en senior afdelings. Hulle het uiteindelik ook die reserwekampioen-ram en die grootkampioen-ram sowel as die reserwe-grootkampioen-ooi en die grootkampioen-ooi vertoon.
Persies van Willowmore presteer
Tydens die Persie-skaapkompetisie het Dirk Lötter van Willowmore die reserwe-grootkampioen-ram sowel as die grootkampioen-ram vertoon.
Lötter het ook die grootkampioen-ooi vertoon en Gielie Oberholzer van Postmasburg, het met die reserwe-grootkampioen-ooi gespog.
Interrasbeeskompetisie
Griekwastad-skou is een van die min plattelandse skoue in die Noord-Kaap wat tradisioneel skaapwêreld is, maar ook met ’n interrasbeeskompetisie kan spog.
Hierdie kompetisie het ‘n unieke geleentheid gebied vir beesprodusente om hul diere teen ander rasse te meet. Beoordelaars Schalk Erlank en Marinda Otto het die moeilike taak gehad om die beste uit vyf mededingende rasse te kies. Uiteindelik is Riekie de Witt se Simmentaler-bul as die grootkampioen-bul gekroon, met Johannes Jordaan se Simbra-bul wat die reserwe-grootkampioen-bul titel ontvang het.
Klik hier om meer van Jansenville-skou te lees.
De Witt het ook die grootkampioen vroulike dier tydens hierdie kompetisie vertoon. Die reserwe-grootkampioen vroulike dier was die Branguskoei van Zirkie Jansen van Griekwastad. Die skoukomitee het reeds weer aangedui dat hulle groot planne het vir volgende jaar se Griekwastad-skou. – Koos du Pisanie, Plaas Media
