Estimated reading time: 2 minutes
Kobie Lochner is pas aangestel as die nuwe uitvoerende hoof van Historic Wines of the Cape, die bestuursmaatskappy van die bekende La Motte Wynlandgoed en Leopard’s Leap Wines.
Lochner is tans die senior bestuurder vir groei en ontwikkeling by Heineken Beverages International en sal op 2 Junie 2025 by Historic Wines of the Cape aansluit. Volgens ’n persverklaring van Historic Wines of the Cape, bring Lochner waardevolle ondervinding, veral ten opsigte van leierskap, strategiese bestuur, en institusionele ontwikkeling na die tafel.
Lochner neem die leisels by Hein Koegelenberg oor, wat teen die einde van 2025 aftree. Koegelenberg was vir 26 jaar by die maatskappy betrokke. Hy het tydens sy loopbaan onder meer baanbrekerswerk vir Suid-Afrikaanse wyn in die Verre Ooste gedoen en is ook as ’n dinamiese figuur binne wyntoerisme bekend. Die familie en direksie van die maatskappy is opreg dankbaar vir sy waardevolle bydrae en wens hom alles van die beste vir die toekoms toe.
Koegelenberg sê: “Kobie is prestasie-gedrewe en mens-gefokus, en dus die ideale persoon om ons wynhandelsmerke in ’n nuwe fase van groei binne ’n uitdagende wêreldklimaat in te lei. Die span by Historic Wines of the Cape het hom hartlik welkom en sien uit na ’n nuwe hoofstuk onder sy leierskap.”
Om deurlopendheid en ’n soomlose oorskakeling te verseker, sal Lochner tot einde 2025 saam met Koegelenberg werk. – Persverklaring, Historic Wines of the Cape
