Estimated reading time: 2 minutes
Die Sandveld se ondergrondse waterreserwes, die regulerende omgewing waarbinne landbou moet funksioneer, klimaatsverandering en hoe dit landbou in die Sandveld beïnvloed, aartappelpryse, sowel as produksie- en bemarkingstendense, is op die Sandveld-aartappelkwekersorganisasie (Sako) se jaarvergadering in die NG Kerksaal in Lambertsbaai bespreek.
Monique Coetzee, voorsitter van die Sandveld-aartappelkwekersorganisasie (Sako), het gesê in die Sandveld draai alles rondom water. Deurlopende navorsing deur Sako en weerstasies verskaf data wat boere in staat stel om water te bespaar en beter te boer. In die opsig neem Sako se werkgroep die leiding om beter praktyke te ontwikkel.
Kommer oor watergebruik
Coetzee het haar kommer oor ’n ekologiese reserwebepaling van die Sandveld se waterbronne deur die Departement van Waterwese en Sanitasie uitgespreek. Die voorlopige bevindinge van die studie kan ’n negatiewe impak op die voortbestaan van aartappelboerdery in die Sandveld hê. “Die departement is tans besig om die finale verslag vir publikasie in die Staatskoerant voor te berei, het Coetzee gesê.
Volgens haar doen die geohidrologie-maatskappy GEOSS onder leiding van sy besturende direkteur, Julian Conrad, al vir 30 jaar ondergrondse watermonitering in die Sandveld. Vanweë die komplekse aard van die gebied verskil die beskikbaarheid en die gehalte van die water aansienlik tussen die verskillende dele van die Sandveld. Dit is daarom noodsaaklik om die gebied in individuele sones te bestudeer.
“ ’n Oorhoofse aanbeveling kan nie vir die hele gebied gemaak word nie. Dit is van kardinale belang dat deurlopende monitoring gedoen word om waterbestuur te verbeter, en ingeligte en doelgerigte besluite te neem,” het Coetzee gesê.
Sandveld word warmer en droër
Stephanie Midgley, spesialiswetenskaplike vir klimaatsverandering by die Wes-Kaapse Departement van Landbou, het gesê die Weskus (Sandveld) het ’n baie stabiele klimaatstelsel oor die lang termyn, maar met klimaatsverandering kom die stabiliteit van die stelsel in gedrang en is die stelsel baie kwesbaar. Die gebied raak warmer en dit is interessant dat die verwarming van minimumtemperature in die nag en nie in die dag, plaasgevind het. Langtermyn studies oor reënval dui op groter uitdroging gedurende die herfsmaande.
“Ons is bekommerd oor klimaatsverandering, maar sien dat boere reeds baie van die maatreëls implementeer wat ons as noodsaaklik beskou om by klimaatsverandering aan te pas. As hulle dit op ’n ekonomiese en volhoubare manier doen, sal dit met verloop van tyd vrugte afwerp,” het Midgley gesê. – Hugo Lochner, Plaas Media
