Estimated reading time: 2 minutes
Willie Storm, ’n bekende boer van die plaas Elliesrust in die Olifantshoek-distrik, is in 2025 as Veeplaas se Klimaatslim-ambassadeur van die jaar aangewys. Tydens die boeredag wat hy ná afloop van die kompetisie op sy plaas aangebied het, het hy sy suksesverhaal met boere gedeel. Heelwat boere uit Namibië het daardie dag bygewoon.
‘n Volgepakte program
Willie se passie en praktyke het ‘n indruk gemaak en daarom gaan hy gedurende Junie vanjaar ’n herlewingslandbou-toer deur Namibië onderneem. Die toer is gereël in samewerking met die Namibiese Landbou-unie en skop op 1 Junie by die Aroab Boerevereniging af. Altus van Schalkwyk sal as gasheer optree.
Die Hochfeld Agri-veiling vind om 10:00 op 3 Junie plaas, waarna Willie en Jaco Schlechter produsente sal toespreek oor bosbeheer, volhoubare weiding en seleksie vir aangepaste diere. Daar sal ook geleentheid vir vrae en bespreking wees. Op 4 Junie lei Willie ’n veldtoer wat om 10:00 op die plaas Wildwasser (D2147/D2148) begin.
Belangstellendes moet vóór 20 Mei 2026 by Jana Jacobi by 081 760 7641 registreer.
Kalkveld Agri-Megadag
Die toer stop egter nie hier nie. Op 6 Junie word die elfde Kalkfeld Agri-Megadag aangebied. Dit is een van die hoogtepunte van die toer, met die tema “Momentum, innovation and the future of farming”, waar Willie as hoofspreker sal optree.
Vir meer inligting kan boere 081 149 9228 skakel of by www.agrimegaday.com registreer. Meer as ‘n 100 uitstallers het reeds vir die dag bespreek.
Outjo, Aranos, Leonardville en Onder-Nossob
Van 11 tot 13 Junie besoek Willie die Rietfontein Boerevereniging, waar Emile Smit as gasheer optree. Daarna is hy op 15 Junie by die Outjo Streekslandbou-unie, waar Pieter Gouws as gasheer sal optree. Op 17 Junie beoog hy ’n plaasbesoek by Danie Visser in die Aranos-omgewing, asook moontlike besoeke aan ander boere daar.
Gert Martins tree op 18 Junie as gasheer op vir die Leonardville-boeredag. Van 20 tot 22 Junie is Willie by die Onder-Nossob Boerevereniging by Danny van Wyk en op 24 Junie is daar ’n boeredag by Timm Miller. Die toer sluit op 25 Junie af met ’n boeredag op Helmeringhausen.
Dit gaan ‘n besige toer wees en lok reeds groot belangstelling. Die program is tans nog onderhewig aan verandering, maar belangstellendes kan Willie Storm intussen skakel by 083 654 5460. – Koos du Pisanie, Plaas Media
