Estimated reading time: 2 minutes
Bloemskou se suiwelprodukskou spog vanjaar met 374 produkinskrywings van 23 vervaardigers landwyd, waarvan vyf vervaardigers nuwelinge is. Hiermee vestig Bloemskou hom as die tweede grootste suiwelprodukskou in Suid-Afrika.
Die reeks deelnemers wissel van sommige van die land se grootste kommersiële vervaardigers tot kleiner privaatvervaardigers.
Suiwelmaatskappye kon in 19 klasse inskryf wat onder meer Goudakaas, Cheddarkaas, spesiale- en eksotiese kase, ’n groot verskeidenheid melkprodukte en bok- en skaapmelkprodukte insluit.
Kundiges beoordeel
Die beoordelingsproses en -standaarde is van die beste in die land. Alle inskrywings word op identiese wyse verpak en dan anoniem aan die beoordelaars oorhandig.
Twintig beoordelaars van regoor die land sal op Woensdag, 4 Maart 2026, van 9:00 tot 13:00 by die Bloemfontein skougronde se Pavilionsaal die produkte beoordeel.
Die beoordelaars is almal uiters bekwaam en sluit kenners van Novonesis en die Departement van Landbou in, sowel as individue met meer as 30 jaar se ondervinding in die bedryf, verteenwoordigers van die grootste suiwelmaatskappy, gesoute kaasmakers en Deon Pastor, sjef van Southern Sun International.
Die uitslae sal tydens die prysuitdeling by vanjaar se Bloemskou bekend gemaak word.
Die jaarlikse Bloemskou word vanjaar van 23 April tot 2 Mei aangebied. – Bloemskou persverklaring
Vir meer inligting oor Bloemskou, besoek www.bloemskou.co.za of skakel die Bloemskou kantoor gedurende kantoorure by 051 448 9894.
