Estimated reading time: 3 minutes
Die bekende Bonsmarastoet by Vrede, Syferfontein Bonsmaras van Nico Pieterse, se 25ste produksieveiling is gekenmerk deur ’n prysvariasie wat dit vir alle kopers moontlik gemaak het om goeie bulle te bekom. Twee bulle het R300 000 elk gehaal, terwyl etlike bulle bo R200 000 verkoop is. ’n Hele paar bulle het tussen R50 000 en R60 000 gehaal. Die gemiddelde prys vir die 57 bulle wat verkoop is, was R95 964,91.
Die eerste R300 000-bul was Lot 10, SYF 200213. Hy is deur Pieter Lourens van Bonga Bonsmaras, Rikus de la Rey van RJ Bonsmaras en dr Paul Theron van Kliphuis Bonsmaras gekoop. Die ander R300 000-bul, SYF 220011, is deur Jonathan Fetting van Alphaeton Bonsmaras gekoop.
Volgens dr Theron het hy en sy twee mede-kopers Lot 10 uitgesoek op grond van sy besonderse genetika en sy diepte, lengte van lyf en uitstekende kloue. Beide sy vaar- en moederlyn is presies wat hulle nodig het om hulle eie kuddes se genetika te verbeter.
Lees meer oor die onlangse AG Bonsmara-veiling hier.
Wat die vroulike diere betref, was die gemiddeld vir dragtige verse R40 937,50, dragtige koeie R43 690,48 en koeie met kalwers R57 500.
Nico Pieterse sê kopers het van regoor die land kom beeste koop, ondanks ’n baie moeilike ekonomiese klimaat. Dit dui op ’n positiewe uitkyk, wat tipies van Suid-Afrikaanse boere is.
“Vanjaar was ons 25ste produksieveiling. Ons eerste veiling het in die jaar 2000 plaasgevind, en oor die jare het ons teeldoelwit nie verander nie. Ons glo in volhoubaarheid. Ons probeer om funksionele, vroegryp beeste te teel met ’n lae onderhoudsbehoefte wat in enige gebied kan aanpas.” – Izak Hofmeyr, Plaas Media
Hoër hoogtes vir Bonsmara SA
Bonsmara SA se Dié Rooi Ras-geleentheid en nasionale veiling in Parys is jaarliks ’n hoogtepunt op die landboukalender. Vanjaar se geleentheid was geen uitsondering nie, veral omdat die genootskap ook sy 60ste bestaansjaar gevier het. Die veiling, met beproefde vroulike teelmateriaal wat van regoor Suid-Afrika kom, het alle verwagtinge oortref met goeie gemiddelde pryse en ’n nuwe rekordprys. Daar was 62 lotte op die veiling wat deur Vleissentraal en SwiftVEE aangebied is met Mike Killassy as afslaer.
