Estimated reading time: 3 minutes
Inskrywings vir die 2026 Suid-Afrikaanse Suiwelkampioenskap het geopen, met Agri-Expo wat suiwelvervaardigers van reg oor die land nooi om in te skryf vir die 193ste aanbieding van Afrika se oudste en grootste suiwelkompetisie.
Die kampioenskap lok jaarliks sowat 1 000 inskrywings van groot, medium en klein vervaardigers oor meer as 100 klasse. Produkte word beoordeel deur ’n onafhanklike paneel kundiges, met elke klaswenner wat as ‘n SA-kampioen bekroon word. Slegs produkte van uitsonderlike gehalte kwalifiseer vir die gesogte Qualité-merk van uitnemendheid, terwyl die produk met die hoogste algehele punt as produk van die jaar aangewys word.
Nuwe hoogtes vir suiwel
Die omvang en aansien van die kompetisie is verlede jaar onderstreep toe ’n rekordgetal 1 110 suiwelprodukte van 77 vervaardigers beoordeel is. ’n Paneel van 103 beoordelaars van 47 maatskappye het die inskrywings oor drie dae geëvalueer, met 114 SA-kampioene en 30 Qualité-bekroonde produkte wat uiteindelik aangewys is.
Volgens Breyton Milford, hoofbestuurder van Agri-Expo, bly die kampioenskap ’n belangrike maatstaf vir uitnemendheid in die Suid-Afrikaanse suiwelbedryf. “Die volgehoue groei in inskrywings bevestig die waarde wat vervaardigers heg aan onafhanklike en geloofwaardige beoordeling,” sê Milford. “Kwaliteit suiwelprodukte verdien erkenning en sigbaarheid by verbruikers – en dit is presies die rol wat hierdie kompetisie vervul.”
Belangrike datums in 2026
- Inskrywings open: Woensdag, 28 Januarie.
- Inskrywings sluit: Maandag 23 Februarie.
- Aflewering van suiwelprodukte: 23 tot 24 Maart (Eensgezind, Durbanville).
- Beoordeling: 25 tot 27 Maart (Eensgezind, Durbanville).
- SA-suiweltoekenningseremonie: Donderdag, 23 April (Nederburg, Paarl).
Skryf in
Vervaardigers kan aanlyn inskryf by www.sadairychamps.co.za. Die 2026 Suid-Afrikaanse Suiwelkampioenskap word moontlik gemaak met die ondersteuning van platinumvennote, IMCD en dsm-firmenich, asook ander borge. Vir meer inligting, skakel 021 863 1599 of 083 440 1628, of stuur ’n e-pos aan dairy@agriexpo.co.za – Agri-Expo-persverklaring
