Estimated reading time: 3 minutes
Wanneer mense geïmmuniseer word, mag dit nét deur opgeleide persone gedoen word. Daar is baie regulasies en wette hieroor, maar wanneer dit by die immunisering van diére kom, kan enigeen sy diere na goeddunke immuniseer in die hoop dat hy die kol tref.
Dit gebeur egter dikwels dat ’n boer nie die gewenste resultate kry nie en die een wat gewoonlik die skuld kry, is die veemedisynemaatskappy.
Dieregesondheid en veral kuddegesondheid is egter nié so ’n eenvoudige onderwerp nie. Die Doornfontein Landbouvereniging op Prieska het besluit om die inligting van kenners te gebruik om hulle kuddes te verbeter. Kenners op die gebied van veemedisyne, dr Angela Buys van Design Biologix en dr Faffa Malan, se hulp is gevra en boere wat die geleentheid bygewoon het, kan nie uitgepraat raak oor die waardevolle inligting nie.
Dr Buys se boodskap was dat elke siekte ’n ander oplossing het en dit help nie jy immuniseer teen iets wat nie in jou omgewing of kudde voorkom nie.
Ent strategies in
“Dit is belangrik om te weet watter siektes in jou omgewing voorkom en wánneer dit voorkom en dan strategies in te ent volgens ’n program, want entstof is nie behandeling nie. Jy het tyd nodig sodat daardie entstof kan begin werk. As jy egter nie nodig het om in te ent nie, moet dan eerder nie,” was haar boodskap.
Sy het ook bygevoeg dat die entstof daar is om die dier se immuunstelsel te versterk. Dit is onwenslik om te véél in te ent. Entstof is duur en jy wil nie geld in die water gooi nie.
Sy glo vleisprodusente moet meer bewus word van dieresiektes, hoe dit ontstaan en wat om daaraan te doen.
Bespaar inentingskostes
Sy sê ook wanneer ’n siekte in jou kudde uitbreek, is dit belangrik om die regte diagnose daarvoor te kry, want om die verkeerde siekte te behandel, kan jou baie geld kos. Sy het egter ook beklemtoon dat immunisering nie help vir siek diere nie. Immunisering is om voortydig op te tree.
Dit is egter nie altyd so maklik om te weet wat die regte diagnose is nie. Dr Buys het beklemtoon dat dit noodsaaklik is om die regte diagnose te kry, want die entstof gaan net werk waarvoor dit vervaardig is. Vra ‘n veearts om jou te help.
Haar raad aan boere is om hulself te bemagtig.
“Vra vrae en moenie alles wat jy lees of hoor, aanvaar nie. Gaan vind uit wat is die oorsaak van siektes en hoe dit kostedoeltreffend behandel of voorkom kan word.
Ken dieresiektes só uit
Dr Faffa Malan het op sy beurt met die boere gesels oor die Famacha-vyfpuntplan om dieresiektes uit te ken.
Hy sê die kleur van die slymvliese in ’n dier se oë is reeds ’n goeie aanduiding van sy gesondheid. Te veel of te min rooibloedselle dui op siekte.
“Haarwurms is bloedsuiers en ’n swaar parasietbesmetting lei tot lae verhouding rooibloedselle-tot-serum,” verduidelik hy.
Ander ondersoekareas is die neusarea om te bepaal of die dier neuswurm het. Longontsteking, longwurm, bloutong en vuilbek kan ook hier geïdentifiseer word.
Liggaamskondisietelling. Diere wat ondergewig is, is moontlik besmet met parasiete soos bruinmaagwurm, bankrotwurm, langnekbankrotwurm, knoppieswurm en peervormige maagslak.
Misondersoek is ’n goeie aanduiding of die dier aan diarree ly. Parasiete wat diarree veroorsaak, is bruinmaagwurm, bankrotwurm, langnekbankrotwurm, knoppieswurm, sambokwurm, peervormige slakwurm, kriptosporidiose en koksidiose.
’n Kwakkeel is weer ’n teken van haarwurm en lewerslakbesmetting.
Dr Buys het boere uitgenooi om hulle te kontak vir meer inligting oor dieresiektes. – Koos du Pisanie, Plaas Media
