Vincent Pike, wenner van die Suid-Afrikaanse Instituut van Afslaers (SAIA) se SA Nasionale Veilingskampioenskap in 2024, dit weer reggekry om die hoogste lof in die veilingsbedryf se voorste geleentheid te kry. Die kampioenskap is onlangs by die Wanderers-klub in Johannesburg aangebied en Pike het weer met die louere weggestap. Buiten hierdie tweede groot oorwinning, was hy ook in 2024 aangewys as die wenner in Plaas Media se jaarlikse Toyota Nasionale Jong Afslaerskompetisie.
Die SAIA-kompetisie word jaarliks aangebied en het die afgelope paar jaar die loopbane van talle van die land se topafslaers ondersteun en bevorder. Tydens die geleentheid ding topafslaers van regoor die land mee deur verskeie lotte vir liefdadigheid op te veil. Deelnemers word op grond van verskeie kriteria beoordeel, insluitend voorbereiding, gehoorbetrokkenheid, beheer van bieërs en botte, asook die doeltreffendheid van hul chant-styl en die algehele sukses van hul veiling.
Vanjaar het Pike, ’n gerekende lewendehawe-afslaer, voor ’n gehoor van sy eweknieë, hoogwaardigheidsbekleërs en ’n kundige beoordelaarspaneel verskyn. Hy het daarin geslaag om weg te beweeg van sy hoogs tegniese en navorsingsgedrewe veeveilings en ’n goed-beheerde, boeiende veiling van wyn en ’n jaguitstappie aan te bied. Toe die hamer uiteindelik val, was ’n netjiese bedrag vir liefdadigheid ingesamel.
’n Betekenisvolle oorwinning
“Hierdie tweede oorwinning was minder senutergend as die eerste, maar dit is geensins vir my minder betekenisvol nie. Dit bevestig eerder dat ek hierdie groot eer tussen die land se topdeelnemers verdien. Dit beteken werklik baie vir my.”
Hy sê dat waarnemers veilings dalk as bloot ’n funksionele verkoopsmetode sien, maar dat daar baie voorbereiding ingaan om goedere positief aan bieërs voor te stel en hulle te lei om ’n billike prys te betaal. Vir hom was sy beheer van die veiling en sy betrokkenheid by die gehoor vanjaar die grootste voordeel.
Soos met sy daaglikse veilings by Vleissentraal Bethlehem, was Pike se strategie tydens die veiling gesentreer op die noukeurige bestuur van verhogings volgens die vraag van bieërs, terwyl hy die regte spoed en struktuur gehandhaaf het om bieërs betrokke te hou.
Voorbereiding en strategie
“Die oomblik toe ek sien die belangstelling groei, het ek die inkremente aangepas en ’n goeie prys behaal.
“Maar vir my het die veiling eintlik baie vroeër begin, tydens die voorbereiding en om die lotte in detail te leer ken voordat ek die ring betree het. Dit het pryskonteks en beplanning rondom die soort vraag wat ek verwag het, ingesluit. Ek het ook die veiling beplan en ’n sterk narratief vir elke lot opgebou voordat ek die verhoog betree het.
“In hierdie spel is voorbereiding alles en om die items te ken en jou huiswerk te doen, is ’n kernaspek van die afslaerswese. Wanneer die tyd dan aanbreek om die veiling te lei, gaan dit oor tempo, asemhaling, ritme en duidelikheid. Dit was vir my ‘n aanpassing om van vinnige lewendehaweveilings na ’n formele kompetisie-omgewing te moes oorskakel,” sê hy.
Pike sê sy oorwinning in 2024 het sy loopbaan ’n groot hupstoot gegee en dat dit tans floreer danksy sy groeiende reputasie in die lewendehawe- en veilingsbedryf. Sy werk as afslaer sluit tans kommersiële lewendehawe, stoetdiere, aanlyn verspreidingsveilings en sommige eiendomsverwante verkope in.
’n Tegnies veeleisende beroep
Pike beskryf die lewendehawe-omgewing as een van die mees tegnies veeleisende afdelings van die afslaersbedryf, aangesien dit die konstante berekening van slagwaardes, markpryse, voerkraalpryse en die huidige toestand van diere vereis. Dit is iets wat oor baie jare aangeleer word en noukeurige aandag aan detail verg, insluitend diepgaande veekennis en ’n goeie begrip van die mark.
Die belangrikste vaardigheid wat hy aangeleer het is waarskynlik die vermoë om onmiddellik besluite te neem sonder om die verkoopproses te vertraag, en dit was duidelik sigbaar op die aand. Dit het ook op verkopers betrekking, waar verwagtingsbestuur en deursigtigheid bepaal of langtermynverhoudings gebou word of nie.
Internasionale mikpunt
Sy fokus verskuif nou na die internasionale verhoog en die National Auctioneers Association Competition in San Antonio, wat van 14 tot 17 Julie plaasvind.
Hy het reeds in 2024 gekwalifiseer, maar kon weens finansiële beperkings nie deelneem nie. Vanjaar beplan hy om SAIA as die 2026 SA Nasionale Veilingskampioen daar te verteenwoordig en met afslaers van regoor die wêreld te skakel en mee te ding. – Persverklaring, SAIA (verwerk)
