Estimated reading time: 3 minutes
Suid-Afrika se top graanprodusente is Vrydagaand vereer tydens die 26ste jaarlikse Graan SA Gala-toekenningsgeleentheid. Onder die tema “Legacy in the Land: The Art of Timing” het die aand hulde gebring aan die volharding, presisie en visie van produsente wat die land se voedselvoorsiening dra.
Die hoogtepunt van die geleentheid was die aankondiging van Hansie Viljoen van Leeudoringstad, Noordwes, as die 2025 Graan SA/Syngenta Graanprodusent van die Jaar. Viljoen, wat saam met sy vrou Wilmarie Viljoen naby Leeudoringstad in Noordwes boer, is geloof vir sy data-gedrewe en volhoubare benadering tot graanverbouing. Sy onderneming, Viljoen Boerdery, kombineer presisietegnologie, grondgesondheid en mense-gesentreerde bestuur om ’n diverse en vooruitstrewende boerdery te handhaaf.
“Hierdie toekenning is nie net vir my nie, maar vir my span en familie,” het Viljoen gesê. “Boerdery gaan oor tydsberekening, spanwerk en vertroue – en dit is vir my ’n voorreg om deel te wees van ’n sektor wat aanhou groei, aanpas en ons nasie voed.”
Die ander finaliste, JP en Thonelle Truter van Moorreesburg, Wes-Kaap, en Riaan en Malanie Taljaard van Hoopstad, Vrystaat, is ook vir hul uitnemende bydraes tot die graansektor geloof.
Die minister van landbou, John Steenhuisen, het die produsente geprys vir ’n rekord-oes van meer as 23 miljoen ton – ’n toename van 30% teenoor die vorige jaar. Hy het ook die regering se verbintenis bevestig om saam met Graan SA te werk aan die verbetering van logistiek en die verwydering van burokratiese struikelblokke.
Graan SA se uitvoerende hoof, dr Tobias Doyer, het die betekenis van uitnemendheid in landbou beklemtoon: “ ’n Goeie plaas vandag moet vier dinge doen: wins maak, grond bou, mense ontwikkel en verantwoordbaar bly. Dít is die kuns van tydsberekening.”
Leierskap geëer
Benewens die hooftoekenning is drie landbouleiers vir hul nalatenskap vereer:
- Jozeph du Plessis het die Inspirasie-toekenning ontvang vir sy 22 jaar diens op Graan SA se uitvoerende raad en sy rol in die ontwikkeling van die sojaboon- en katoenbedrywe.
- Jaco Minnaar, voormalige voorsitter van Graan SA, is met ’n Goue Graan-toekenning vereer vir sy leierskap en toewyding aan volhoubaarheid.
- Derek Mathews, aftredende voorsitter, het ook ’n Goue Graan-toekenning ontvang vir sy visie en diens aan die organisasie.
Die aand het ook die sukses van Graan SA se Phahama Grain Phakama (PGP)-program gevier, wat opkomende produsente help groei van kleinskaal tot kommersiële sukses. Volgens Jeremia Mathebula, visevoorsitter van Graan SA, is ware boerderysukses gewortel in geloof, dissipline en leierskap.
Die gala het nie net prestasie gevier nie, maar ook die veerkragtigheid en toewyding van Suid-Afrika se graanprodusente – die bewaarders van die grond en bouers van die toekoms. – Graan SA Persverklaring verwerk deur Plaas Media
