Estimated reading time: 4 minutes
Die Brahman Beestelersgenootskap van SA se eerste nasionale aanlynveiling is afgehandel, met beide hoogte- en laagtepunte. Sietze Smit, rasdirekteur van die genootskap, sê die aanbieding van ’n nasionale aanlynveiling was vir hulle ’n nuwe ervaring.
Hy glo die genootskap breek nuwe grond met hierdie foto- en video-veiling wat deur BKB in samewerking met die aanlynplatform Meerkat by die Koöperasie Kroeg en Kos in Potchefstroom aangebied is. Gareth Hughes was die afslaer.
Smit sê daar is oorspronklik beplan om die nasionale veiling in die tradisionele formaat by die Afridome in Parys aan te bied, met diere wat fisies in die ring vertoon sou word. Volgens hom was die noodsaaklike besluit geneem om die formaat en ligging te verander weens die situasie rondom bek-en-klouseer (BEK) in die land, en die hoë risiko verbonde aan die tradisionele aanbieding van hul nasionale veiling. Die genootskap het gevolglik besluit om eerder ’n aanlynveiling aan te bied – ’n besluit wat gemengde resultate opgelewer het.
Volgens Smit het die veiling in sekere opsigte goed verloop, en in ander gevalle minder goed. Tog bly hy optimisties oor die toekoms. “Ons sien uit na die veranderinge wat hierdie nuwe formaat vir ons in die veebedryf, en spesifiek ook in die aanbieding van stoetdiere op veilings, gaan meebring,” sê hy. Hoewel daar ongetwyfeld groeipyne in hierdie verband is, loof Smit die betrokkenes wat binne minder as tien dae die ekstra myl gestap het om dit ’n werklikheid te maak.
’n Belangrike boodskap
Smit sê die genootskap se boodskap met dié aanlynveiling was dat dit ’n waardevolle platform gebied het om van die beste genetiese materiaal in die bedryf aan te bied en te verkry. Hy sê dat beide diegene wat aanlyn deelgeneem het en dié wat fisies teenwoordig was, kon sien dat die diere wat aangebied is streng geselekteerde en uitstaande teelmateriaal verteenwoordig het. Hy sê die BEK-situasie sal op die langtermyn hersien word.
Dit is die negatiewe aspek van die huidige omstandighede ten opsigte van beperkings, maar die positiewe kant is dat ’n aanlynformaat gewys het dat dit wel ’n werkbare opsie is. “Die veiling was lewendig en aktief – beide op die vloer en aanlyn – wat daarop dui dat mense bereid is om deel te neem, mits behoorlike beplanning en tydige reëlings getref word.
Smit sê die genootskap beklemtoon dat die besluit om nie met die tradisionele formaat van hul nasionale veiling voort te gaan nie, in belang van die breë bedryf en veral die Brahman-telers geneem is. ’n Veiling in Parys sou in ’n hoë-risiko-gebied plaasgevind het, en die besluit is dus geneem om die telers, hul diere, en die stoetbedryf as geheel te beskerm.
Die hoogste prys van die dag
Die hoogste prys op die veiling was vir Lot 3, die bul Sir Nicolaas (S-B 2017) van Jaco Schlebusch van Schlebusch Brahmane by Delareyville. Die bul is vir R280 000 aan Nikkie Fourie van VTV Boerdery by Christiana verkoop. Schlebusch beskryf die bul as ’n ‘volledige pakket’ wat uitstekende EBV’s (beraamde teelwaardes) en fenotipiese eienskappe insluit. Hy het ’n goeie toplyn, baie diepte en kapasitiet, staan stewig op sy bene en beweeg gemaklik.
Die hoogste prys vir 3-in-1 koeie was vir Lot 22, S-B 2016, ook van Schlebusch wat vir R70 000 aan dieselfde koper, Nikkie Fourie, verkoop is. Die koei is ses maande dragtig en het ’n topgehalte-bulkalf, (S-B 254) aan haar sy. Sy beskik oor ’n uitstekende wigvorm, breedte, en kapasiteit.
Smit sê die Brahman Genootskap van SA sien uit na volgende jaar se nasionale veiling en verseker dat enige uitdagings wat mag ontstaan, daadwerklik aangespreek sal word. – Christal-Lize Muller
Vir meer inligting kontak Sietze Smit by 083 712 9965 of info@brahman.co.za.
