Só lyk ’n slagoskompetisie-wenner

Estimated reading time: 4 minutes

  • ‘n Slagoskompetisie is ‘n vertoonvenster vir kommersiële produsente en dit verg vernuf om onder die wenners gereken te word.
  • Die grootste suksesfaktore is die gehalte van die kalf, die voer wat gebruik word en die vetheidsgraad wat die kalf aan die hak behaal.
  • Dit is nie moontlik om die vetverspreiding onder die vel te sien tydens op-die-hoef-beoordeling nie, maar die bouvorm gee vir jou ’n baie goeie aanduiding hoe die karkas gaan lyk as hy aan die hak hang.
  • Vetverspreiding oor die agterkwart is baie belangrik omdat die duurste snitte hier voorkom.
  • Die vetverspreiding oor die karkas is uiters belangrik wanneer dit by slagoskompetisies kom. Daar is ’n verskil tussen ’n vet bees en ’n bespierde bees.

‘n Slagoskompetisie is ‘n vertoonvenster vir kommersiële produsente en dit verg vernuf om onder die wenners gereken te word. Lubbe Jacobs van Lubern Voere en ‘n bestuurslid van die SA Vetveebeoordelaarsvereniging (SAFJA), glo dit is maklik om ’n kalf te voer, maar alles moet reg verloop om daardie kalf op kompetisiedag as die wenner te laat uitstaan.

Goeie gehalte diere

Lubbe sê die grootste suksesfaktore is die gehalte van die kalf, die voer wat gebruik word en die vetheidsgraad wat die kalf aan die hak behaal. “Die gehalte van die kalf speel verreweg die grootste rol. ’n Swak kalf sal nooit goed gevoer kan word nie. Die kalwers wat goed presteer aan die hak is die kalwers wat vroeg al die beste bouvorm het.”

Lees meer oor die wenners.

Dit is nie moontlik om die vetverspreiding onder die vel te sien tydens op-die-hoef-beoordeling nie, maar die bouvorm gee vir jou ’n baie goeie aanduiding hoe die karkas gaan lyk as hy aan die hak hang. Lubbe sê om die regte bouvorm en goeie vetverspreiding aan die hak te behaal, moet die volgende aspekte reg wees:

Breedte

Die kalf moet goeie breedte in die borsvloer hê. Dit is gewoonlik ’n aanduiding dat die kalf goeie breedte regoor sy lyf sal hê. Die kalf moet goed gevul wees agter die blad. Daar is egter ’n ander kant van die munt. As die borsstuk te swaar vertoon kan dit ’n aanduiding wees van ’n oorvet bees met swak spierontwikkeling.

Van die ander aspekte waarna die beoordelaar sal oplet is die skouer wat breed moet vertoon met ’n egalige skouer/buik aanhegting.

Sprong van rib

Goeie sprong van rib is ’n vereiste. Dit gee aan die kalf goeie kapasiteit en verseker goeie bespiering op die rug. Lengte van lyf speel ’n belangrike rol, want hoe langer die lyf is, hoe meer duur snitte is daar vir die slagter beskikbaar.

Die beoordelaars let op fasette soos ’n goed-ontwikkelde oogspier wat van die skof tot by die heupe strek. Dit sluit duur snitte soos die T-been, filet en primarib in. Met ’n goed-ontwikkelde oogspier sal die lende sterk vertoon en ’n goeie heup-/lende-aanhegting tot gevolg hê.

Agterkwart

Vetverspreiding oor die agterkwart is baie belangrik omdat die duurste snitte hier voorkom. Volgens Lubbe is daar by die kalf se agterkwart verskillende punte waarop gelet moet word:

  • Die kalf moet ’n goeie lengte van heup tot sitbeen hê.
  • Die afstand tussen die sitbene moet wyd wees, want dit verseker dat die kalf goeie breedte in sy agterkwart het.
  • Hy moet goed gevul wees in sy binnedye en die beoordelaars kyk na goeie buitedye.
  • Die binne- en buitedye moet laag afkom.

Vetheid en gewig

Die vetverspreiding oor die karkas is uiters belangrik wanneer dit by slagoskompetisies kom. Daar is ’n verskil tussen ’n vet bees en ’n bespierde bees.

Vleis is spiere wat die bouvorm beïnvloed. ’n Bespierde bees is breër oor die buitedye as oor die toplyn (middelstuk) terwyl ’n vet bees geneig is om breër oor die middelstuk en nouer en platter oor die buitedye te wees. Beoordelaars moet let op die patroon van die vet wat op die karkas aangepak is, naamlik vanaf die skouers af ondertoe en agtertoe.

Behalwe dat die gewig van die kalf tussen 250 en 340kg moet wees, moet die vetheidsgraad ’n A2 of A3 wees. Lubbe beklemtoon dat goeie vetverspreiding oor die hele karkas moet voorkom.

Daar moet ook ’n goeie balans oor die hele karkas wees. “Dit beteken dat die drie dele van die karkas, naamlik die boud, rug en voorkwart goed aan mekaar geheg moet wees en nie uit drie los dele bestaan nie.” – Koos du Pisanie, Veeplaas

Vir meer inligting oor kursusse wat SAFJA vir junior beoordelaars aanbied, kontak Lubbe Jacobs by 082 610 7491.

Must read

Weeklikse plaashek-rooivleispryse / Weekly farm gate red meat prices

Estimated reading time: 5 minutes Die jongste vleispryse word weekliks aan u gebring deur Absa en die RPO. Neem kennis dat hierdie nie kleinhandelpryse is nie, maar wel plaashekpryse wat BTW uitsluit. Get the...

Confirmed Eastern Cape AHS virus outbreak: Weathering the storm

Due to the African horse sickness (AHS) outbreak in the Eastern Cape, movement restrictions have been imposed in the Grahamstown state veterinarian area. After consulting with nearby state veterinarians, it was agreed that no...

RSG Landbou: 4 Maart 2024 – geborg deur MSD

Respiratoriese siektes kom al meer by beeste voor. Daar is verskeie redes hiervoor, maar swak ontwikkelde longe is ‘n groot oorsaak. Dr De Wet Barnard van MSD Animal Health verduidelik waarom die montering van...

Uitdagings vir die volgende generasie veeboere

Estimated reading time: 4 minutes Die volgende generasie veeboere sal oor die volgende 20 tot 30 jaar met verskeie ontwrigtings in die produksie- en bemarkingsomgewing te doen kry. Veeboere moet reeds beskikbare tegnologieë binne die...

Van landbouskou tot landbouskou – Plaas TV dek almal

Estimated reading time: 2 minutes Hierdie week het Plaas TV weereens vir interessante kykstof gesorg en vandag is #kykweervrydag. Hier is ’n opsomming van dié week se episodes: Die jaarlikse Beaufort-Wes Landbouskou in die hartjie van die...