Estimated reading time: 2 minutes
Alhoewel die bees-en kleinveeskou van vanjaar se Bloemskou nie plaasvind nie, gaan die SA Stamboek/Vleissentraal Nasionale Elite Bulgroeitoetsklas steeds op ’n alternatiewe wyse voort.
Organiseerders het bevestig dat, ten spyte van die afwesigheid van ’n tradisionele skouring, waar ’n algehele wenner aangewys word, erkenning steeds gegee sal word aan die uitstaande bulle wat vir die 2026-klas gekies is.
Die bulgroeitoetsklas, wat jaarliks as ’n belangrike vertoonvenster vir topteelbulle dien, bring gewoonlik diere byeen wat op grond van prestasie, genetiese meriete en funksionele voorkoms gekeur is. Vanjaar sal dié elemente egter nie in ’n fisiese beoordeling saamgevoeg word nie.
Foto versoek
In plaas van die tradisionele skouring vol diere word telers en eienaars versoek om hoëgehaltefoto’s van hul genomineerde bulle in te dien. Hierdie foto’s sal in die Elite 2026 uitgawe van SA Stoetteler verskyn en ook tydens die SA Stamboek/Unistel Nasionale Elite 2026-dinee op 27 April by Monte Bello vertoon word.
Tydens die geleentheid sal sertifikate aan alle betrokke telers en eienaars oorhandig word as erkenning vir hul diere se prestasies. Verdere blootstelling vir die bulle sal deur sosiale media, webblaaie en landboumedia verseker word.
Die skildery van die 2025-wenbul, geborg deur Vleissentraal, sal ook tydens die dinee aan die betrokke teler of eienaar oorhandig word. – SA Stamboek persverklaring verwerk deur Plaas Media
