Estimated reading time: 5 minutes
Bergrivier Besproeiing se “Passie vir jou boerdery”-dag wat onlangs by die Nederburg-wynlandgoed gehou is, het besoekers beïndruk, veral wat die omvang, gehalte en praktiese waarde van die program betref.
Die geleentheid, wat die atmosfeer van ’n kleinskaalse Nampo-uitstalling geskep het, het besoekers blootgestel aan waardevolle bedryfsinsigte en praktiese oplossings vir volhoubare waterbestuur, asook die uitdagings waarmee boere daagliks te kampe het.
’n Boodskap van inspirasie en volharding
Volgens Bergrivier Besproeiing se besturende direkteur, Stephan Naudé, word sukses gebou op veerkragtigheid, konsekwentheid, gedeelde waardes, ’n gemeenskaplike visie, verantwoordelike besluitneming en die toewyding om elke dag op te daag.
“Die doel van die dag was om boere weer te inspireer en hul passie vir landbou aan te wakker te midde van die talle uitdagings wat die bedryf in die gesig staar,” sê die siviele ingenieur met 38 jaar se ervaring in die besproeiingsbedryf. “Ons het produsente, landbou-entoesiaste, verskaffers en kundige sprekers by Nederburg-wynlandgoed verwelkom om saam te gesels en die beste uit ’n geleentheid soos dié te put.”
Klimaatslim beplanning en samewerking
Wes-Kaapse minister van plaaslike regering, omgewingsake en ontwikkelingsbeplanning, Anton Bredell, het die impak van die onlangse storms en vloede in die provinsie bespreek. Hy het klem gelê op die belangrikheid van klimaatslim beplanning om toekomstige uitdagings beter te hanteer.
Teen die einde van die dag, wat deur baie as ’n ware mylpaal beskou is, het Naudé almal wat dit bygewoon het, hartlik bedank: “Aan al die produsente, landbouleiers en rolspelers wat saamgekom het om idees uit te ruil, nuwe perspektiewe te ontdek en waardevolle netwerke te bou – dankie dat julle saam met ons die passie vir landbou vier en help bou aan ’n sterker toekoms vir die bedryf.” Carin Venter, Plaas Media (Foto’s: Natalie Gabriels)
