Estimated reading time: 6 minutes
Riversdal-skou met sy tema “Eg Plattelands” is vanjaar vir die 157ste keer gehou en het ’n rekordgetal besoekers gelok. Dit was opvallend dat meer mense van buite ons distrik vir ons kom kuier het, het Pieter van Wyk, voorsitter van die Riversdal Landbougenootskap, na afloop van die skou gesê.
Van Wyk het Plaas Media bedank vir sy betrokkenheid by die skou en die blootstelling wat vooraf aan die skou gegee is. “Die voorafbemarking deur Plaas Media, wat die skou se mediaborg was, het definitief ’n uitwerking op die getalle gehad.”
Die skou se program was propvol hoogtepunte en het afgeskop met ’n Groetmekaar-geleentheid waarheen meer as 300 vertoners, borge, uitstallers en beoordelaars genooi is.
Demper op beeste
Van Wyk het gesê bek-en-klouseer het weer vanjaar ’n demper op die Jersey- en die vleisbeesskou geplaas. Telers het minder diere na die skou gebring, maar die diere wat hulle gebring het, was van uitstaande gehalte.
Ses Jersey-telers met 30 beeste het aan die Suid-Kaap Jersey-kampioenskappe deelgeneem. Andrew Masterson, die hoofbeoordelaar van die Jerseyskou, het gesê die gehalte van die diere wat aan die kampioenskappe deelgeneem het, was baie goed.
“Die wenners was baie eners, met goeie suiweleienskappe, uitstekende uiers en goeie beweging. Die koeie is aanpasbaar en sal onder enige boerderytoestande, hetsy op weidings of in ’n volvoerstelsel, hul kant bring”, het Masterson gesê.
Altesame nege vleisbeesrasse het vanjaar aan die vleisbeesskou deelgeneem. Die hoogtepunt was die aanwys van die opperste kampioen manlike en vroulike dier van die skou. Masterson, wat ook die hoofbeoordelaar van die interraskompetisie was, het gesê die beeste wat aan die interras deelgeneem het, was puik diere.
Hy het op die belangrikheid van skoue gewys. “As daar nie skoue is nie, sal die publiek nie besef waar vleis of melk vandaan kom nie. Dit is ’n manier om die publiek nader aan die boer en nader aan die landbou te bring. Ons moet sorg dat skoue aanhou groei,” het Masterson gesê.
Merinoram van die Jaar
Riversdal-skou het vanjaar vir die eerste keer ’n Wes-Kaapse Merinoram van die Jaar aangewys. Die Suid-Kaap Merino-kampioenskap het vanjaar 18 Merino-telers met meer as 200 diere gelok. ’n Ram van Adriaan Geldenhuys van Uitkyk Merino’s, Riversdal, is as die eerste Wes-Kaapse Merinoram van die Jaar aangewys.
Boerbokskou bars uit nate
Die Wes-Kaap Boerbok- en Kalahari Red-kampioenskappe was so gewild dat daar nie genoeg plek vir al die diere was nie en van die inskywings moes weggewys word. Altesame 16 telers met 350 bokke het om die kampioenskappe meegeding.
Andries Vollgraaff, een van die beoordelaars, het gesê die Boerbokskou is vanjaar vir die vierde jaar op Riversdal aangebied. In die vier jaar, het die gehalte van die diere merkbaar verbeter. Die getalle wat ingeskryf word, wys ook op die gewildheid van Boerbokke dwarsoor die land.
Twee skape in 53 sekondes geskeer
Hans van Schalkwyk van DG Snyman Skeerdienste was die wenner van vanjaar se spoedskeerkompetisie op Riversdal. Van Schalkwyk het in die eindrondte twee skape in net 53 sekondes afgeskeer. Hy het prysgeld van R10 000 ontvang.
AJ van Wyk, organiseerder van die spoedskeerkompetisie, het gesê 20 van die land se beste spoedskeerders het vanjaar aan die kompetisie deelgeneem. Die skeerders het in uitkloprondtes teen mekaar meegeding. In die uitkloprondtes moes die skeerders enkelskape so vinnig as moontlik skeer, maar moes waak teen foute wat hulle outomaties gediskwalifiseer het.
Spesiale klem op jeug
Volgens Pieter van Wyk, kry die jeug kry spesiale aandag tydens die skou met ’n jeugskou en ’n massa atletiek-aflos waaraan verskeie skole, landbouverenigings en senior spanne deelneem. By die jeugskou het die kinders in drie ouderdomsgroepe (junior-junior, junior en senior) in die volgende klasse deelgeneem: Kleinvee (skape en bokke), pluimvee, perde, kulinêre kuns, suiwelbereiding, konyne, suiwelbeeste, en vleisbeeste.
Ander afdelings op die skou was ’n pluimveeskou (sowat 350 pluimvee), ’n Boerboelskou, ‘n perdeskou en die NWKV-skaapskeer- en wolhanteringskompetisie. – Hugo Lochner, Plaas Media
