Estimated reading time: 3 minutes
Somerset-Oos se 198ste landbouskou, wat van 5 tot 7 September gehou is, het, ten spyte van die leë kleinveestalle as gevolg van streng bek-en-klouseer-maatreëls, verskeie aktiwiteite vir oud en jonk gebied.
Die Suid-Afrikaanse Boerperdkampioenskap en Saalperd-streekskou, ope klasse en spoggerige miniatuurperde wat stof in mekaar se oë geskop het, het vanjaar groot en klein se aandag getrek. Behalwe vir die algemene jaarvergadering van die Kaapse Boerperdtelersvereninging, is ’n onthaal gehou vir die skou-borge, uitstallers en vertoners. Daar was ’n hondeskou onder toesig van die plaaslike veeartse, ’n 4×4 “Fun” op die baan-kompetisie, ’n OVK-baaldrakompetisie en ’n gimnastiekvertoning. By die damesoggend is leersame praatjies en demonstrasies aangebied, en verder het die perde-jeugskou, kinderkuns en uitstalling baie genot verskaf. En, soos enige volwaardige skou, was daar ’n steakete en skoudans.
Uitstaande lammers
In die skougenootskap se slaglamkompetisie was daar altesaam 22 inskrywings. Die lammers is by Somerset-Oos se Meats Abattoir geslag en gegradeer, en daarna is die inspeksie en puntetoekenning van die karkasse op dieselfde perseel uitgevoer. Volgens die kompetisie se hoofbeoordelaar, Erick Klopper van BKB, was die gehalte van die lammers uitstekend en was dit ’n moeilike taak om net twee wenners aan te wys.
Martin Lombard van OVK en Jacques Loubser van BKB was in beheer van die vagkompetisie en het tydens die beoordeling daarvan onder meer punte toegeken aan die wol se treksterkte, eweredigheid van lengte, egaligheid van stapel, olie en kleur. Die veseldikte en skoonopbrengs, wat die prys van ’n vag beïnvloed, is ook in ag geneem.
Volgens ’n skou-organiseerder, Ezelle Marais, dien die jaarlikse geleentheid nie net as ’n heerlike saamkuiergeleentheid nie, maar dit is ook ’n ekonomiese inspuiting vir die gemeenskap van Somerset-Oos is. “Dit is ook slegs moontlik danksy die ondersteuning van al die borge, vertoners, die landbougenootskap se organiseerders, en almal wat die skou bywoon,” het sy gesê. “Volgende jaar maak ons weer so met die hoop om die skou nog groter en beter te maak en nog meer besoekers te lok.”
Vir meer besonderhede, kontak Ezelle Marais by 082 552 2309 of ezelle@r63.co.za. – Carin Venter, Plaas Media