Estimated reading time: 2 minutes
Die landbougroep OVK met sy hoofkantoor op Ladybrand, het onlangs sy mees lojale produsente tydens ’n glansgeleentheid op Bloemfontein vereer. Sewentig toekennings is op die aand uitgedeel as bewys dat OVK en hul kliënte langs een vuur sit.
Chris Bender, OVK se voorsitter, sê te midde van talle uitdagings, wat boere die hoof moet bied, is dit vir OVK belangrik om deurgaans stabiliteit aan hul kliënte te verseker. Die aand was dus ’n geleentheid om kliënte, wat op OVK se steun staatmaak, te vereer vir dít wat hulle tot die Suid-Afrikaanse landbou bydra.
Om in aanmerking vir ’n toekenning te kon kom, is ’n kliënt se geskiedenis met die landboumaatskappy in aanmerking geneem. Na aanleiding van dié verhouding is produsente dan in kategorieë verdeel en toekennings is aan die hand daarvan gemaak.
Van die toekennings van die aand:
- OVK algehele toppresteerder: Das Ram Boerdery
- Grootste handelkliënt: Number Two Piggeries (Pty) Ltd
- Grootste wolprodusent: Four Daughters
- Grootste bokhaarprodusent: Allemanskraal Boerdery
- Grootste versekeringskliënt: Lerouxfin (Edms) Bpk
- Grootste graanprodusent: Zoetwater (Edms) Bpk
- Grootste meganisasiekliënt: JCS Farming
- Grootste springmielieprodusent: GDJ Scholtz
“Hierdie funksie beklemtoon dat elke kliënt, groot of klein, belangrik is vir OVK. Nes ons personeel is elke kliënt vir ons ’n bate,” sê Bender
Bender beklemtoon dat wedersydse lojaliteit uiteindelik die hoeksteen van die glansgeleentheid is wat daargestel word om verhoudings, nie net tussen OVK en sy produsente-kliënte te versterk nie, maar ook die verhouding met insetverskaffers te versterk, en verder uit te bou. Uiteindelik is verhoudings immers belangriker as omset. – Elnieke Bronkhorst, Plaas Media
