Estimated reading time: 3 minutes
Die Noord-Kaap Veldram Projek (NKVP) het op 5 Februarie hul jaarlikse produksieveiling gehou. Tydens die geleentheid is 66 Dorperramme, 24 Wit Dorperramme, 17 Van Rooy-ramme en 15 Boerbokramme van die hand gesit.
Veldramme se pryse styg stewig
Die pryse het sommer by die eerste Dorperram goed begin styg. Die duurste Dorperram is vir R80 000 verkoop. Hierdie ram het aan Charl Kleinhans van Steytlerville behoort en is aan Christo van Deventer van Prieska verkoop.
Die duurste Wit Dorperram kom uit die stoet van Johannes Human en is aan Nico Steyn verkoop. Steyn het aanlyn op die veiling meegeding. Die ram het hom R24 000 uit die sak gejaag.
Steyn het ook die duurste Boerbok van Louis janse van Rensburg van Prieska vir R22 000 gekoop.
Die duurste Van Rooy-ram het aan Anel Liebenberg van Prieska behoort en is aanlyn deur Johan Stadler vir R12 000 gekoop.
Die gemiddelde pryse vir die Dorper-stoetramme was R14 272 terwyl die wit Dorper-ramme gemiddeld R12 333 behaal het. Die Van Rooy-ramme is teen ’n gemiddeld van R8 764 verkoop en die Boerbokke teen ’n gemiddeld van R11 333. – Koos du Pisanie, Plaas Media
