Estimated reading time: 4 minutes
Dit is daardie tyd van die jaar wanneer al my neefs wat dollars verdien in die Verenigde State, terugkeer na Suid-Afrika met verhale van diep sneeu, groot bakkies en nóg groter boerderytoerusting.
So is dit dan ook met die groot bakkie van Oekraïne. Vroeër vanjaar het Langjan, wat gedurende oestydperk op ’n megaplaas in Noord-Dakota naby die Kanadese grens werk, ’n rits foto’s van dié monster gestuur.
“Ons was een van die eerste plase in Noord-Amerika wat die voertuig getoets het. Alles daarop is ontwerp met die oog op doeltreffendheid van skaal. Die graantenk hou 36m3 graan wat teen 600ℓ per sekonde uitgepomp word. Ek het skaars tyd gehad om die lugrem in die trok aan te skakel, toe is die drom vol en moes ek weer wegtrek,” het Jan gesê.
’n Kampioen plaasbakkie
Trouens, die enigste ding waaroor Jan meer praat as die nuwe monster, is die ou Hilux wat hy vir ’n paar honderd dollar gekoop het. “Dit is die ideale plaasbakkie,” sê hy, terwyl ons gaan kyk na die lammers wat hy met sy dollars by dok Jay se plaas naby Newcastle wou koop. “Dit is goedkoop om te herstel en kan orals ry, selfs met ’n ton op die bak.”
“Ek kan dieselfde vir my ou bakkie sê,” antwoord dok Jay.
“Ai, daai ou Indiese bakkie? Hy het net tweewielaandrywing en die ou drie-liter het skaars wringkrag. Wat is die Newton daarop? Iets soos 200?” spot Jan.
“Dit is eintlik 225 Newton,” sê dok Jay, “en almal van hulle skop by 1 500 omwentelinge in. Met sneeukettings en die ewenaarslot aan, kan ek op enige plek op my plaas ry gedurende die reënseisoen – en ek kry twee keer die kilometers wat jou Yank-tenk vir jou gee.”
“Dok Jay het ’n punt beet,” sê ek. “Die beste plaasbakkie het nie die sterkste enjin nodig nie. Dit benodig bande met goeie greep en ’n ratkas wat die enjin se krag by lae toere kan verlaag.”
“Ek kan byvoeg dat die ideale plaasbakkie ook goedkoop moet wees,” sê dok Jay. “Daarom het ek die ou tweedehandse Indiese bakkie gekoop. Hulle het geen herverkoopwaarde nie, so jy kry hulle spotgoedkoop, maar dit is die enigste bakkie wat ’n Hilux teen kruipspoed teen ’n heuwel kan volg.”
Side-by-side tot die redding
“Julle is albei verkeerd,” sê ek. “Die beste plaasbakkie is ’n side-by-side, soos ek juis laas naweek weer gesien het. Ons het twee hengelaars by die kothuis gehad. Die een het daar aangekom in ’n nuwe bakkie op groot 35-duimbande en die ander in ’n bakkie met standaard 18-duimbande.
“Dit was te reënerig om vis te vang so ons het gaan kyk of hul bakkies verder by ‘Die Heuwel’ kon opkom as die punt waar my Land Cruiser gewoonlik vassit. Die een het tot heeltemal bo gegly-gly, terwyl die ander een basies onder op een plek gestaan en spin het.
“Oom Stian het met sy side-by-side daai helling op en af gejaag asof dit ’n gelyk teerpad was en ons met daai vet ballonbande uit ons gate getrek. So, volgens my maak ’n side-by-side die beste plaasbakkie. Hulle is lig en rats en kan meer as 200kg soutlek lewer op plekke waar selfs die bokke sukkel om te klim.”
“My ou Hilux dra meer as ’n ton en ek het nog nie sand of sneeu gekry wat my sal laat vassit nie. Dit is net op gladde ys waar ek nie kanse waag nie,” sê Jan.
“Ek haat dit om julle albei se beste plaasbakkie-borrels te bars, maar wanneer dit kom by die verrigting van werklike werk, soos om skape teen die laagste prys per kop te verskuif, hou ’n nederige ou sedan sedert 2008 al die rekord,” lag dok Jay. “Dit was toe die veediefstaleenheid in Vrede vier mans gearresteer het en 14 dragtige Merino-ooie uit die sedan verwyder het. Hoe’s daai vir die maksimering van drakapasiteit!”
![Toyota SA logo](https://agriorbit.com/wp-content/uploads/2021/10/Toyota-SA-logo-wp.jpg)