Estimated reading time: 2 minutes
Die Ellisras-beesskou, wat van 4 tot 6 Julie 2024 plaasvind, is ‘n hoogtepunt op die Bosveld-streek se landboukalender. Hierdie jaarlikse geleentheid trek produsente en landbouliefhebbers van regoor die land na die hartjie van Limpopo om deel te neem aan ‘n verskeidenheid aktiwiteite wat die landboubedryf vier.
Die skou se program skop op 4 Julie af met die kleinveeskou, waarna die beoordeling van die grootvee plaasvind. Die dag eindig op ‘n gesellige noot met ‘n kenmekaar potjie-aand.
Vrydag, 5 Julie, vind die beoordeling van individuele Brahmane en Simmentalers, asook die voorbereiding vir die jeugskoukompetisie, plaas. Die kleinveeskou, waar junior en senior ramme en ooie meeding vir die gesogte titels, hervat. Die dag sluit af met ‘n vertonersfunksie en prysuitdeling vir beide groot- en kleinvee.
Die laaste dag van die skou begin op 6 Julie met die beoordeling van grootvee en die jeugskou vind ook plaas, gevolg deur ‘n beesstudiegroepbespreking. Die kleinveeveiling begin om 11:00, wat ‘n geleentheid bied vir kopers om topgehalte diere aan te skaf.
‘n Viering van die gemeenskap
Die Ellisras-beesskou is nie net ‘n plek waar landboukundigheid en vee tentoongestel word nie, maar ook ‘n viering van die gemeenskap en die ondersteuning van borge wat die skou moontlik maak. Plaas Media, as die trotse mediaborg, speel ‘n sleutelrol in die bevordering van die skou en die deel van inligting oor die aktiwiteite. Die skou se ander borge is saam met Molatek, Obaro, André Kock & Seun Limpopo, en Driehoek Voere.
Deur die jare het die skou gegroei tot ‘n platform waar kennis gedeel word, nuwe tegnologieë ontdek word, en langdurige vriendskappe gesmee word. Dit is ‘n bewys van die krag van samewerking en die passie vir landbou wat so ryklik in die Ellisras-streek gevind word. – Renate Louw, Plaas Media
Vir meer inligting, skakel Guy Emslie by 079 514 7061
