Estimated reading time: 4 minutes
Die Suid-Afrikaanse Vetveebeoordelaarsvereniging (Safja) het onlangs sy jaarlikse opleidingskursus, algemene jaarvergadering en prysuitdeling vir 2024 se nasionale karkaskaskompetisiewenners aangebied. Tydens die geleentheid by Platrand Lodge in KwaZulu-Natal is Malcolm Moodie, een van die stigterslede van die vereniging sestien jaar gelede, vereer vir meer as 35 jaar se diens aan vetveebeoordeling.
Die vereniging bied jaarliks ’n opleidingskursus vir aspirantbeoordelaars aan, wat terselfdertyd ook as opknappingskursus vir bestaande beoordelaars dien. Een nuwe junior beoordelaar, Neal White van Bergville, is aangestel. Aspirantbeoordelaars gaan deur ’n streng teoretiese en praktiese opleidingsproses voordat hulle as junior beoordelaars kwalifiseer, waarna hulle by ’n gegewe aantal kompetisies as hulpbeoordelaar moet optree voordat hulle in aanmerking kan kom om ’n senior beoordelaar te word.
Tydens die AJV is ’n nuwe voorsitter, Lubbe Jacobs, verkies. Die nuwe bestuurskomitee is Espee Olivier, Andrew Adams, Duncan Watson, Hennie du Toit en Jan de Jong.
Die wenners in die onderskeie kategorieë is as volg:
- Enkelbeeskarkas – Ottawa Ranches van Jakkalskop (Bonsmara).
- Groepbeeskarkas – OO WEE Boerdery van Jakkalskop (Bonsmara).
- Enkelskaapkarkas – Boytjie Crispin van Delareyville (Ile de France).
- Groepskaapkarkas – Louwrens Haasbroek van Delareyville, Wit Dorper.
- Biltongkoei – Willlie de Jager van Stella. Willie het ook gedurende dié geleentheid erelidmaatskap vir jarelange diens ontvang.
- Tersiêre instelling – Owen Sithole College of Agriculture.
- Opkomende boer, enkel – Scott Moshane van Sernick.
- Opkomende boer, groep – Scott Moshane van Sernick.
Die versklillende skoue wat karkaskompetisies aangebied het, is ook beoordeel en die beste skou vir beeste was Underberg-skou, terwyl Delareyville Expo die beste skaapkompeteisie aangebied het.
Volgens die nuutverkose voorsitter van Safja, Lubbe Jacobs, is Safja se missie om produsente op te lei ten opsigte van die eienskappe wat die beste waarde tot ’n karkas toevoeg. Hoewel dit in kompetisie-verband gedoen word, is die wenmotief sekondêr. Dit gaan hoofsaaklik oor wins – watter tipe karkas bring die meeste geld in die sak. – Izak Hofmeyr, Plaas Media
