Estimated reading time: 3 minutes
Die lang wag is verby – die bekroonde Suid-Afrikaanse Kaasfees is terug op Stellenbosch met nuwe datums én nuwe eienaars. Die Sandringham-landgoed sal gasheer wees vir hierdie buitelug-kulinêre geleentheid oor die Erfenisdag-langnaweek vanaf Vrydag 22 September tot Maandag 25 September 2023. Die nuwe feeseienaars, ‘n konsortium van private beleggers en die DGTL Marketing Group, het die gewilde fees herontwerp om ‘n vier-dag-lange fees van kaas, wyn en vermaak vir die hele gesin te skep.
Die SA Kaasfees, bekend as Suid-Afrika se enigste kaas-gefokusde geleentheid, is sedert 2002 ‘n gevestigde tradisie in die Kaapse Wynland. Die nuwe eienaars het uitgebreide ervaring in die organisering, bemarking en aanbieding van leefstylgeleenthede regoor die land en sal die SA Kaasfees na nuwe hoogtes neem. Besoekers kan ‘n opwindende ervaring verwag met nuwe lewe wat in die fees geblaas word.
‘n Program propvol pret en vermaak
Die SA Kaasfees skop op Vrydag 22 September 2023 af met besigheidsamesprekings om handel tussen uitstallers en kleinhandelwinkels aan te moedig. Die fees open amptelik met ‘n musiekfees op die Vrydagaand. Vanaf Saterdag 23 September tot Maandag 25 September sal meer as 150 uitstallers die publiek met die beste kaas-aanbiedinge en ‘n wye verskeidenheid ander wyn- en boetiekbier-handelsmerke verwelkom.
Gewilde plaaslike kunstenaars sal tydens die musiekfees optree. Daarmee saam sal topklas-kindervermaak en karnaval-styl pretpark-aktiwiteite die hele gesin vermaak.
Lees meer oor die kaasmakers van Williston.
Goeie nuus vir SA Kaasfees-liefhebbers in ander dele van SA
Jacques Fourie, verteenwoordiger van die nuwe eienaars, sê: “Ons is opgewonde om die 2023-geleentheid te bevestig en saam met alle uitstallers en vennote te werk om die voortgesette sukses van hierdie belangrike gebeurtenis op die Wes-Kaapse geleentheidskalender te verseker.
“Die 2023-geleentheid is eintlik die 20ste weergawe van die SA Kaasfees, nadat die 2020- en 2021-feeste weens Covid-19 gekanselleer is en ‘n kleiner geleentheid verlede jaar aangebied is. Die fees het nou al die bestanddele om ‘n vlagskipgeleentheid op die kulinêre kalender in Suid-Afrika te word.”
Volgens Fourie het die nuwe eienaars ook planne om die SA Kaasfees reeds in 2024 na Johannesburg en KwaZulu-Natal te bring, wat beslis die waarde vir bestaande vennote en uitstallers sal verhoog.
Kyk hier na ‘n onderhoud met Fourie:
“Die SA Kaasfees is ‘n merkwaardige ervaring vir kosliefhebbers en fynproewers,” sê Fourie. “Met ‘n verskeidenheid kulinêre uitstallers, plaaslike wyne, boetiekbiere, jenewer, musiekkonserte en vermaaklike vertonings deur koskenners, is daar iets vir almal by hierdie fees.
“Die heerlike kaassoorte en nisprodukte te proe en te koop, sal jou mond laat water, en die plesierige atmosfeer sal jou met onvergeetlike herinneringe laat. Of jy nou ’n gesoute fynproewer is of bloot nuuskierig is om iets nuuts te probeer, is die 2023 SA Kaasfees ’n geleentheid wat jy nie moet misloop nie!”
Kaartjies binnekort beskikbaar
Verdere inligting oor kaartjiepryse en gasvryheidsaanbiedinge sal in die komende weke aangekondig word, met kaartjies wat na verwagting vanaf Junie 2023 te koop sal wees. Kaartjies is beperk tot 10 000 besoekers per dag. Volg die SA Kaasfees op sosiale media Facebook: @SACheeseFestival, Instagram and Twitter: @SACheeseFest #SACheeseFest and #CheeseLovers en hou die feeswebwerf dop by www.cheesefestival.co.za.
Registrasie open Maandag 8 Mei 2023 via die SA Kaasfees-webtuiste vir uitstallers. Vir meer inligting oor hoe om as uitstaller te registreer, kontak die uitstallerbestuurder Reinette Basson by reinette@cheesefestival.co.za.
Een van die nuwe toevoegings tot die SA Kaasfees is privaat of gedeelde gasvryheidsaanbiedinge vir vennote en borge. Toegewyde fasiliteite en unieke ervarings sal aangepas word volgens borge se behoeftes.
Vir alle vennootskap- en borgskapverwante navrae, kontak Nicole Windbrechtinger, direkteur van die DGTL Marketing Group, by nicole@dgtl-group.com.
