Estimated reading time: 7 minutes
Van die land se top skaapprodusente is vanjaar by die Suid-Afrikaanse Vleisbedryfmaatskappy (Samic) se Nasionale Slaglamkompetisie vir hul harde werk vereer. Vanjaar se karkasse was van ‘n besondere hoë standaard en beoordelaars moes behoorlik kopkrap om die landswye wenners aan te wys.
Die skaapprodusente van Williston het vanjaar behoorlik skoonskip gemaak. Uit die 24 pryse wat uitgedeel is, het 18 na produsente in dié distrik gegaan. Verlede jaar het produsente uit die Williston-omgewing dieselfde hoeveelheid pryse verower.
Samic het ook, soos verlede jaar, besluit om die pryswenners in hul eie omgewing te vereer en daarom is die jaarlikse prysuitdeling vir hierdie kategorie van die kompetisie, dan ook in Williston aangebied.
Lees meer oor die 2022 Williston-slaglamkompetisie hier.
Tydens die geleentheid is eretoekennings aan Coetzee Reitz en Danie Franken vir hul bydraes tot die volhoubaarheid van die kompetisie in die Noord-Kaap oorhandig.
Die prysuitdeling is deur Dirk Zandberg van Samic aangebied en die pryse is deur Patrick Neels, koördineerder van Samic se Noord-Kaapse streek, oorhandig.
Wenners in die slaglamkompetisie
In die bokafdeling vir opkomende produsente vir 2022/23 het Julihan van Wyk van Williston met die meeste pryse weggestap. In die enkelkarkaskategorie het hy die eerste plek met ’n persentasie van 92,93% en die tweede plek met 89,74% ingepalm. In die groepkarkas-afdeling het hy ook die eerste plek met 88,30% losgeslaan. Hierdie karkasse is tydens die Williston-skou vertoon. Nog ’n wenner in die bokafdeling was Sakkie Sass, wat die tweede plek in die groepkarkaskategorie met ’n goeie 84,68% ingepalm het.
In die bokafdeling vir kommersiële produsente het Frans Louw die beste enkelkarkas met ’n uitstekende 95,54% vertoon.
Gretha van der Colff van Williston het aan Samic se bokafdeling vir kommersiële telers deelgeneem en het in die landswye kompetisie die tweede plek met 94,24% ingepalm. Sy het die beste groepkarkasse met ’n persentasie van 92,65% vertoon.
Williston-skou doen baie moeite om opkomende produsente te betrek en met die slaglamkompetisie is vir hulle ’n afsonderlike kompetisie aangebied waar hulle teen mekaar kon meeding. Hierdie produsente het ook op nasionale vlak aan die Samic-kompetisie meegeding en tydens die prysuitdeling op Williston, het Karel Jonkers die prys vir die beste lamkarkas (opkomend), met ’n persentasie van 95,92%, ontvang.
Johnnie Coetzee het die tweede plek in die enkellamkarkaskategorie vir opkomende produsente by die slaglamkompetisie met ’n persentasie van 94,57% behaal. Coetzee het ook die eerste plek behaal vir sy lamkarkasgroep met ’n totaal van 91,38%.
Nog ’n presteerder onder die opkomende produsente was Grieta Vlok van Williston wat in die nasionale kompetisie die tweede beste lamkarkasgroep met ’n persentasie van 90,47% vertoon het.
Bertus Steenkamp se enkellamkarkas het die eerste plek verower met 99,48%.
Coetzee Reitz het vanjaar die tweede beste enkellam in die nasionale slaglamkompetisie vertoon. Hy was met minder as 0,5% kort op Bertus Steenkamp se hakke. Sy lam het ’n baie goeie 99,14% behaal.
Reitz is vir baie jare al betrokke by die opheffing van opkomende produsente en moedig hulle elke jaar aan om aan die Samic Slaglamkompetisie deel te neem met die doel om die gehalte van hul kuddes te toets en verbeter.
Hy is bekend vir die moeite wat hy doen om kommersiële produsente by te staan en hulle te help om hulle skaapboerderye te verbeter. Volgens die kompetisie-organiseerders is hy een van die mense wat in die stilligheid baie meer doen as waarvoor hy erkenning ontvang.
Dirk Zandberg van Samic het vanjaar moeite gedoen om aan hom ’n spesiale eretoekenning tydens die prysuitdeling te oorhandig. Hy sê die werk wat Coetzee doen om die gehalte van skaapboerdery in ’n groot deel van die Noord-Kaap te bevorder, verdien applous.
Takkies Reitz van Williston het vanjaar uitstekend gevaar in die slaglamkompetisie. Hy het die beste lamkarkasgroep met ’n persentasie van 97,52% vertoon.
Danie Franken was vir jare by die Carnarvon abattoir betrokke en is tans by die abattoir op Williston betrokke. Hy is ook een van die rolspelers in die rooivleisbedryf wat ’n groot bydrae lewer tot die sukses van die Samic Slaglamkompetisie. Samic het vanjaar aan hom ’n eretoekenning oorhandig vir sy bydrae om die kompetisie te laat vlot én om die skaapbedryf in die Noord-Kaap ’n hupstoot te gee. – Koos du Pisanie, Plaas Media
