Estimated reading time: 2 minutes
Die Mededingingstribunaal het die samesmelting van VKB en GWK op 21 Desember 2022 goedgekeur, kort ná dit deur die Mededingingskommissie aanbeveel is. Dit volg ná gesprekke tussen dié twee maatskappye wat reeds in Julie 2020 afgeskop het, GWK se aandeelhouers op 11 Augustus 2022 ten gunste van die samesmelting gestem het, en VKB se direksie die transaksie vroeër in 2022 binne hul mandaat goedgekeur het.
Die samestelling en ontwerp van die transaksie is gedryf deur verteenwoordigers van GWK en VKB, in samewerking met ʼn eksterne, onafhanklike korporatiewe adviseur, Pallidus, om ʼn ooreenkoms saam te stel wat verseker dat albei partye beskerm en bevoordeel word. Die verteenwoordigers van GWK en VKB het krities gaan kyk na verskeie aspekte, onder meer sinergieë in terme van maatskappykultuur en -struktuur, ʼn gedeelde visie om landbou te bevorder, die behoud van ʼn besigheid in boerebesit en die voortsetting van gehalte-ondersteuning aan produsente op plase.
Lees meer oor die aanloop tot die samesmelting hier.
Dr PG Strauss, besturende direkteur van die VKB Groep, sê dit is goeie nuus dat die Mededingingstribunaal die samesmelting van VKB en GWK goedgekeur het. “Die onderskeie bestuurspanne van VKB en GWK sal vergader rakende die volgende stappe en proses vorentoe sodra daar aan alle uitstaande opskortende voorwaardes rakende die transaksie voldoen is, ingesluit finale goedkeuring deur die Oorname Reguleringspaneel, waarna verdere kommunikasie met kliënte, personeel, aandeelhouers en ander belanghebbendes sal volg. Intussen gaan albei maatskappye soos normaal voort.”
Llewellyn Brooks, besturende direkteur van die GWK Groep, sê dit is ʼn groot mylpaal in die geskiedenis van die twee maatskappye wat ná baie werk die afgelope twee jaar behaal is. “Die transaksie gaan groot geleenthede vir al ons belanghebbendes ontsluit. Ons is opgewonde daaroor dat ons nou kan voortgaan met beplanning om die landboumaatskappy van die toekoms te bou.” – Persverklaring, GWK en VKB
