Estimated reading time: 2 minutes
Niel Venter, operasionele direkteur van die Sparta Groep, is tydens die algemene jaarvergadering van die Rooivleis-abattoirvereniging (RVAV) by die Lord Charles Hotel in Somerset-Wes as nuwe voorsitter van die vereniging verkies. Hy volg dr Kabols Le Riche op wat sedert 2017 voorsitter van die RVAV was. Laurie Terblanche, eienaar van Tomis Abattoir, is as ondervoorsitter herverkies.
Dr. Le Riche het gesê die rooivleisbedryf het die vermoë om die regering te ondersteun in broodnodige aksies om die bedryf ten goede te transformeer. Die rooivleiswaardeketting het onlangs strukture in plek gekry wat in die toekoms ‘n baie belangrike rol sal speel om bystand aan die regering te verleen met aksies op grondvlak om te verseker dat dieregesondheid en die veiligheid van vleis altyd voorop gestel word.
Kyk Plaas TV se insetsel oor die Suid-Afrikaanse rooivleisbedryf.
Venter het na afloop van die jaarvergadering gesê dat hy as voorsitter in diens sal wees van die vereniging en sy lede. “Die Rooivleis-abattoirvereniging sal as organisasie aanhou om sy lede se behoeftes eerste te stel. ‘n Groot deel daarvan is om seker te maak dat ons opleiding voorsien, veral AgriSeta-goedgekeurde opleiding vir voedselveiligheid en slagtegnieke.”
“Die vereniging sal ook seker moet maak dat die bedryf volhoubaar bly en sy lede in vandag se onsekere tye leiding gee waar daar ‘n behoefte ontstaan,” het Venter gesê. – Hugo Lochner, AgriOrbit
Rooivleis: Marges op karkaspryse nie abnormaal
Die faktore wat die marges op karkas- en speenkalf- of speenlampryse bepaal, is die oorsaak dat die gaping tussen dié twee pryse die laaste ruk groter geword het. Die marges op karkasse is dus nie abnormaal hoog nie, het prof Frikkie Maré van die Universiteit van die Vrystaat tydens die Rooivleis-abattoirvereniging (RVAV) se kongres by die Lord Charles Hotel in Somerset-Wes, gesê.
