Estimated reading time: 2 minutes
Die jaarlikse Philipstown-interskou is op 24 Junie vanjaar op die plaas Vrede van Diederik Vermeulen in die Philipstown-distrik aangebied.
Prof Theo Venter van die Universiteit van Johannesburg was die gasspreker van die oggend. Met “Die stand van die ekonomie in die land en vooruitsigte” as tema, het hy oor die politieke kwessies in die land, en wat Suid-Afrikaners kan verwag met die volgende verkiesing, uitgebrei.
Volgens hom sal landbou altyd ’n rol in die toekoms van die land speel, omdat dit so ’n lewensbelangrike sektor is. Daar word baie houe na die landbou gemik maar, het hy gesê, boere moet hulle nie te veel daaraan steur nie. Landbou se troefkaart is dat Suid-Afrikaners elke dag steeds moet eet.
Die beoordeling van jong Merino-ooie tydens die Philipstown-interskou was geen maklike taak nie. Beoordelaars het groepe van ses ooie volgens hul wol en bouvorm beoordeel. Van links is Carl Battenhaussen (ringmeester van Philipstown), Pierre-Louw Fourie (BKB Victoria Wes), Hardie van der Heever (House of Fibre), Johan Botes (House of Fibre) en Hannes Olivier (OVK Beaufort Wes). Die wenners is later die aand tydens ’n funksie aangekondig.
Johan en Michael Malan van Simonsig-wyne het ’n kort bekendstelling van hul produkte aangebied.
Isak Staats van BKB was die gasspreker tydens die middagsessie. Dit tema van sy praatjie was “Hoe sien jy jou gat?” en boere was nuuskierig om te hoor wat hy oor so ’n op-die-man-af-onderwerp te sê het.
Sy boodskap was dat elke boer hom- of haarself moet oriënteer en dit wat hy of sy kan doen, goed doen. Net soos daar op die meeste veeplase nie plek vir passasiers is nie, het hy gesê, is daar in die landbou as geheel ook nie meer plek vir passasiers nie. Diegene wat nie hul kant gaan bring nie, sal uitval en hul plekke gaan deur ander boere ingeneem word. Om volhoubaar te boer verg kennis, insig en ’n besef dat ’n mens moet aanpas by die veranderende vraag van die verbruiker.
Lees meer oor NWKV se skaapdag.
Jongooi Interklub-kompetisie
Die hoof-aktiwiteit van die dag was die Jongooi Interklub-kompetisie. Nege Jongooi-klubs het hieraan deelgeneem. Groepe van ses ooie van die Middelburg-, Noupoort-, Junior Modern Merino’s-, die Modern Merino’s-, Kraankuil-, De Aar-, Philipstown-, Colesberg- en die Vrystaat Jongooi-klubs het om die eerste plek meegeding.
Johan Botes en Hardie van den Heever van House of Fibre en Hannes Olivier van OVK het die beoordeling behartig, met Carl Battenhaussen as ringmeester en Pierre-Louw Fourie van BKB as beampte.
Verskeie wolprodukte is tydens die Philipstown-interskou uitgestal en te koop aangebied.
Hulle het na die diere se bouvorm asook hul wol gekyk. By die bouvorm is opgelet na die dier se kop, voorkwart, middellyf, agterkwart en bene en by die wol is opgelet na die kwaliteit, egaligheid van die wol, olie, lengte en onderlyne.
Die beste ooitjie van die dag kom uit die kudde van Carl Battenhaussen van Philipstown en die klubs wat die eerste drie plekke verower het, was Junior Modern Merino’s in die eerste plek, Philipstown tweede en Modern Merino’s in die derde plek. – Koos du Pisanie, AgriOrbit
