Estimated reading time: 2 minutes
Van begin tot einde Januarie 2026 versterk die rand teenoor die Amerikaanse dollar met 51 sent. Die wisselkoers sluit Januarie op R15,98 vir een Amerikaanse dollar af.
Die rand verswak steeds teenoor die euro met 25 sent in Januarie en sluit af op R19,07 vir een euro. Die produsenteprysinflasie bly onveranderd vir Desember soos vir die twee voorafgaande maande en word bereken op 2,9%. Die verbruikersprysinflasie styg met 0,1% in Desember 2025 en is bereken op 3,6%.
Wisselvallige mieliepryse
Die prys van geelmielies het gedurende Januarie wisselvalligheid beleef en sluit die maand af teen R3330/ton, wat sowat R47 laer is as aan die begin van die maand.
Beeskarkas- en speenkalfpryse daal
Die beeskarkasprys het ’n afwaartse neiging getoon met die gemiddelde A2-karkasprys wat gedurende Januarie met R4,34/kg daal en die maand op ’n gemiddeld prys van R66,75/kg afsluit. Die gemiddelde prys van B2-karkaspryse daal met sowat R1,20/kg en sluit die maand af op R62,31.
Die gemiddelde prys van C2-karkasse het met sowat R2,09/kg gedaal om die maand op ’n gemiddeld van R60,62/kg te eindig. Die gemiddelde speenkalfpryse daal met sowat R0,29/kg na verlede maand se styging en sluit die maand op R40,88/kg af.
Figuur 1: Klas A-Beeskarkaspryse
Skaapkarkaspryse styg steeds
Die skaapkarkaspryse toon steeds effense styging. Die gemiddelde prys van A2-skaapkarkasse styg met R1,18\kg en bereik in Januarie ’n gemiddeld van R112,44/kg. Die gemiddelde prys van B2-skaapkarkasprys styg steeds met sowat 78 sent/kg en sluit af op ’n gemiddeld van R84,75/kg.
Die prys van C2-skaapkarkasse neem egter met 39 sent/kg af en eindig die maand op R83,85/kg. Die prys van ’n speenlam daal effens gedurende Januarie met ’n gemiddelde prys van R50,66/kg wat aangeteken is.
Varkkarkaspryse behou stygende tendens
Die gemiddelde prys van O-varkkarkaspryse ervaar ’n verdere styging van 22 sent/kg vir Januarie 2026. Ons sluit die maand op ’n gemiddeld van R39,44/kg af. – Carli Jacobs en dr W.A. Lombard, Departement Landbou-ekonomie, Universiteit van die Vrystaat.
