Landbou in Noordwes verloor ‘n staatmaker

Estimated reading time: 3 minutes

Landbou in Noordwes het onlangs een van sy groot geeste, wat diep spore in die bedryf getrap het, aan die dood afgestaan. Leon Bellingan, bestuurder van Agri Vryburg en ’n deeltydse kommersiële beesboer, is op 1 Desember op die ouderdom van 59 in die Emoya-Med-hospitaal in Bloemfontein oorlede.

Sy dogter, Anneke Scholtz, sê haar pa het vermoedelik aan ’n neurologiese spiertoestand gely, hoewel dit nie met ’n diagnose bevestig is nie. Sy sê hy is vanjaar op 8 September in die hospitaal opgeneem waarna sy toestand tot en met sy afsterwe verswak het. Sy en haar broer, Imiel en suster Bea, is hartgebroke.

Anneke sal altyd haar pa onthou as ’n man wat baie geduld aan die dag kon lê. “Hy was vir ons ’n versorger en was altyd baie geduldig. Daar kon ’n bom langs hom ontplof en hy sou net rustig sit en die situasie bekyk en vandaar af met groot insig optree.” Sy sê Bellingan het op die familieplaas, Lucknow, in die Vryburg-distrik, grootgeword en was van jongs af passievol oor landbou. Sy kudde bestaan uit Bonsmara-koeie en Charolais-bulle. Anneke sê haar pa het weens omstandighede deeltyds geboer, maar hy was van plan om na sy aftrede volgende jaar weer voltyds na sy boerdery terug te keer.

Lees meer oor die onlangse brande in Noordwes.

‘n Ware staatmaker

Leon het in 2014 ’n eretoekenning van Agri Vryburg ontvang vir sy toewyding aan georganiseerde landbou. Sy liefde vir georganiseerde landbou het as hoofseun van die Hoër Landbouskool Noord-Kaapland in Jan Kempdorp begin. Hy het later ’n diploma in landbou aan die Glen-landboukollege buite Bloemfontein verwerf. Leon het in 1991 by Lourensgeluk-boerevereniging aangesluit en in 1998 as ondervoorsitter en in die 1990 ’s as voorsitter gedien.

Onder sy voorsitterskap het hiérdie landbouvereniging destyds van 18 na 75 lede gegroei. Hy was ook ’n verteenwoordiger vir Lourensgeluk-boerevereniging by die Vryburg Boere-unie waar hy later op die dagbestuur gedien en vervoerkwessies hanteer het.

Hy is in 2004 as voorsitter van die Vryburg Boere-unie verkies en het dié unie op Agri Noordwes se algemene raad verteenwoordig. Onder sy leiding is dié unie in 2004 en 2005 as Agri Noordwes se beste landbou-unie aangewys. Hy was vanaf 2001 tot 2004 aan stuur van vervoerkwessies vir Agri Noordwes en is in 2005 as dagbestuurslid vir Streek 5 aangewys.

Bellingan is in 2008 op ’n voltydse basis as bestuurder van Agri Vryburg aangestel en was sover bekend die eerste bestuurder op landbouvereniging-vlak in Noordwes. Hy was ook een van die lede wat op die aksiekomitee gedien het tydens onderhandelinge met Naledi Munisipaliteit rakende die veilingskrale in Vryburg. Dit was vanaf April 2007 onder sy bestuur en hy was die direkteur van North West Stockfair Kraals vir Agri Vryburg.

Nou betrokke by boere

Willem Pretorius, ’n produsent van Kameel in die distrik, sê hy en Bellingan het ’n lang pad saam gestap. “Leon was ’n yster en het die hele Vryburg-distrik se produsente persoonlik geken.

Hy het goeie oortuigingsvermoë gehad en jy kon altyd op sy knoppie druk. Hy kon baie dinge doen en het vir ons as produsente baie beteken.” Volgens Pretorius het Bellingan hom uitstekend van sy taak gekwyt om kwessies soos grondbelasting en kortings aan te pak. Hy was ook nou betrokke by die plaaslike brandbeskermingsvereniging en is in 2009 as bestuurder van die Dr Ruth Mompati-distriksmunisipaliteit se brandbeskermingsgebied aangewys.

Bellingan se lewensmaat, Hanlie Swanepoel, sê hy was toegewyd tot landbou en sy sal hom altyd onthou as ’n sagte omgeemens met ’n ondeunde laggie wat baie lief was vir sy kinders en kleinkinders.

Bellingan laat ook sy ma Morleen (88), skoonseun Werner, skoondogter Nadia, kleinkinders, Erich en Sias, en ’n broer en suster agter. – Christal-Lize Muller, Plaas Media

Must read

Bull selection, the smart way

Estimated reading time: 7 minutes When it comes to genetic progress in a herd, the simple truth is that a bull contributes up to 90% of this progress. This is a fact that beef...

Ellisras-beesskou: Die hartklop van landbou in Limpopo

Estimated reading time: 2 minutes Die Ellisras-beesskou, wat van 4 tot 6 Julie 2024 plaasvind, is 'n hoogtepunt op die Bosveld-streek se landboukalender. Hierdie jaarlikse geleentheid trek produsente en landbouliefhebbers van regoor die land...
World Ocean Day

RSG Landbou: 12 Junie 2024 – geborg deur BKB

Wêreld Oseane-dag is op 7 Junie gevier. Dis nie net die natuurlewe in die see wat bedreig word nie, maar ook vissersgemeenskappe. Dis hier waar Ocean Basket ‘n verskil maak. Ons gesels met Marco...
Die sprekers by die boeredag was, van links: Rhys Sims van 4MIX International, Christopher Sparks, Herman Nel van die Grassfed Association of South Africa en Graham Hobbs, naburige Nguniteler en keurder.

Bemarkingsknelpunte uitgelig op Nguni-boeredag

Estimated reading time: 3 minutes Tydens ’n Nguni-boeredag wat op die plaas van Christopher Sparks van Sparks Nguni’s by Swinburne in KwaZulu-Natal aangebied is, is verskeie knelpunte bespreek wat eie is aan die Nguni...
Saoedi-Arabië het verlede week die verbod op vleis- & rooivleisprodukinvoere vanaf SA gelig maar die eerste besending gaan nog 'n ruk wees.

RSG Landbou: 11 Junie 2024 – geborg deur BKB

Die invoer van kalwers van buurlande is een van die grootste knelpunte vir rooivleisprodusente in die Noordwes-provinsie. So sê Nico Kilian van RPO Noordwes. Ons hoor wat hy verder te sê gehad het tydens...