Die Charolais-bul, Louwcoe Daniel CB 21119, van Louwcoe Charolais van Clocolan in die Oos-Vrystaat, is by die Bloemskou aangewys as die wenner van die Vleissentraal SA Stamboek Elite-bulgroeitoetsklas. Volgens die teler van die bul, Louwrens Viljoen, was die bulletjie een van ‘n groep van 18 Louwcoe-bulletjies wat vir die klas genomineer is.
“Ek het hom gekies want ek glo dis die tipe bul wat ons wil teel. Sy vaer, Louwcoe Ambrose, is ‘n selfgeteelde bul wat ons redelik baie in die stoet gebruik het. Hy kom uit ‘n baie goeie moederlyn. Ons gebruik reeds een van sy halfboeties in die stoet en hy is self ook ‘n baie struktureel-korrekte bul. Daniel is egter hier omdat hy die groeisyfers het. Dit wys vir ons dat die bulle wat ons gebruik, wel nageslag teel wat ons in die stoet kan gebruik en wat uitstaan in die ras.”
Bulgroeitoetsklas: Oog en syfers ontmoet
Louwrens sê die feit dat die bulgroeitoetsklas twee belangrike seleksiekriteria bymekaarbring, naamlik groeisyfers en visuele aspekte, is baie belangrik. As dié twee aspekte in harmonie is, word die tree in telingsvordering al hoe groter. Dit geld nie net vir hulle eie kudde nie, maar ook vir die ras.
Die seleksieproses om genomineer te word, en dan uiteindelik as finalis te kwalifiseer, is baie streng, volgens vanjaar se hoofbeoordelaar, Llywellyn Angus. Elke rasgenootskap nomineer ‘n bulletjie op grond van sy groeisyfers en bouvormkorrektheid, waarna die kandidate dan in die skouring visueel beoordeel word.
“Vanjaar was daar 21 bulle in die ring, waarvan die finale vyf na die volgende rondte van beoordeling deurgedring het. Daarna is die top drie bulle geselekteer, waaruit die uiteindelike wenner dan aangewys is. Dis belangrik om te besef dat elke bul binne die konteks van sy eie ras se standaard van voortreflikheid beoordeel word. Dit is die vyf bulle met die hoogste persentasiepunte in hierdie beoordeling wat dan deurdring na die volgende rondte.”
Kenmerke wat die deurslag gee
Die top drie bulle was ‘n Limousin, Rooi Angus en die Charolais wat uiteindelik as wenner gekroon is. “Die Charolais het die hoogste punte gekry, terwyl die ander twee finaliste presies dieselfde punte behaal het. Wat die deurslag in die guns van die Charolais gegee het, is sy hoogstaande manlikheid, bespiering en loopvermoë.”
Die Vleissentraal SA Stamboek Elite Bulgroeitoetsklas, sê dr Japie van der Westhuizen, hoofbestuurder van SA Stamboek, is ‘n klas waarin die room van die verskillende rasgenootskappe in een ring meeding. Dit is inderdaad ‘n elite-kompetisie. “Die onderliggende doelwit van die klas,” sê hy, “is om telers aan te moedig om te meet, en eienskappe van ekonomiese belang te evalueer. Die klas bring egter ‘n tweede aspek ter sprake, naamlik die funksionele bouvorm van die bul. Hierdie twee aspekte dra dieselfde gewig. Die behoefte van die rooivleisprodusent is immers om geneties-hoogstaande bulle te gebruik wat funksioneel in staat is om hul werk te kan doen.” – Izak Hofmeyr, Veeplaas
